ಗೋಡ್ಸೆ- ಸಾವರ್ಕರ್ ನಂಟಿನ ಕುರಿತು ನ್ಯಾ. ಕಪೂರ್ ತನಿಖಾ ಆಯೋಗ ಹೇಳಿದ್ದೇನು?

0
33

ನ್ಯೂಸ್ ಕನ್ನಡ ವರದಿ: ರಾಷ್ಟ್ರಪಿತ ಮಹಾತ್ಮಾ ಗಾಂಧಿಯನ್ನು ಹತ್ಯೆ ಮಾಡಿದ ಸ್ವತಂತ್ರ ಭಾರತದ ಮೊಟ್ಟಮೊದಲ ಭಯೋತ್ಪಾದಕ ನಾಥೂರಾಂ ಗೋಡ್ಸೆಯನ್ನು ಭಾರತೀಯ ಜನತಾ ಪಕ್ಷದ ಅಭ್ಯರ್ಥಿ ಹಾಗೂ ಸ್ವತಃ ಭಯೋತ್ಪಾದನೆ ಆರೋಪ ಎದುರಿಸಿರುವ ಸಾಧ್ವಿ ಪ್ರಗ್ಯಾ ಸಿಂಗ್ ‘ದೇಶಭಕ್ತ’ ಎಂದು ಬಣ್ಣಿಸಿರುವ ಹಿನ್ನೆಲೆಯಲ್ಲಿ ಗಾಂಧಿ ಹತ್ಯೆಯ ಕರಾಳ ಇತಿಹಾಸ ಮತ್ತೆ ಚರ್ಚೆಗೆ ಬಂದಿದೆ. ವಾಸ್ತವವಾಗಿ ಗೋಡ್ಸೆ ಕುರಿತ ಈ ಬಾರಿಯ ಲೋಕಸಭಾ ಚುನಾವಣಾ ಕಣದ ಈ ಚರ್ಚೆ ಹುಟ್ಟಿದ್ದು ಖ್ಯಾತ ನಟ ಕಮಲ್ ಹಾಸನ್ ಕಳೆದ ವಾರ ನೀಡಿದ “ಸ್ವತಂತ್ರ ಭಾರತದ ಮೊದಲ ಭಯೋತ್ಪಾದಕ ಒಬ್ಬ ಹಿಂದೂ. ಆತನ ಹೆಸರು ನಾಥೂರಾಂ ಗೋಡ್ಸೆ” ಎಂಬ ಹೇಳಿಕೆಯಿಂದ.

ತನ್ನ ಅದ್ವಿತೀಯ ಹೋರಾಟದ ಮೂಲಕ ದೇಶಕ್ಕೆ ಸ್ವಾತಂತ್ರ್ಯ ಗಳಿಸಿಕೊಟ್ಟ ಮಹಾತ್ಮನನ್ನೇ ಮತಾಂಧತೆಯ ಅಮಲಿನಲ್ಲಿ ಗುಂಡಿಕ್ಕಿ ಕೊಂದ ವ್ಯಕ್ತಿಯೊಬ್ಬನನ್ನು ಭಯೋತ್ಪಾದಕ ಎನ್ನದೆ ಮತ್ತೇನೆನ್ನಲು ಸಾಧ್ಯ? ಮತ್ತು ಆತ ಹಿಂದುತ್ವದ ಅಮಲೇರಿದ ಮತಾಂಧ ಎನ್ನವುದನ್ನು ತಳ್ಳಿಹಾಕುವುದು ಉಂಟೇ? ಆದರೆ, ಈ ಸತ್ಯವನ್ನು ಹೇಳಿದ ಕಮಲ್ ಹಾಸನ್ ವಿರುದ್ಧ ಬಿಜೆಪಿ ಮತ್ತು ಸಂಘಪರಿವಾರದ ಮಂದಿ ಕೆಂಡಕಾರತೊಡಗಿದರು. ಅವರ ಮೇಲೆ ಚಪ್ಪಲಿ ಎಸೆಯಲಾಯಿತು. ಹಲ್ಲೆ ಯತ್ನಗಳೂ ನಡೆದವು. ಗಾಂಧಿಯನ್ನು ಹತ್ಯೆ ಮಾಡಿದ ವ್ಯಕ್ತಿಯನ್ನು ತಮ್ಮ ಆರಾಧ್ಯ ದೈವ ಎಂದು ಪೂಜಿಸುವ ಅದೇ ಮಂದಿಯನ್ನು ಪ್ರತಿನಿಧಿಸುವ ಮತ್ತು ಸ್ವತಃ ಮಾಲೇಗಾಂವ್ ಸ್ಫೋಟ ಪ್ರಕರಣದಲ್ಲಿ ಆರೋಪಿಯಾಗಿ ಜೈಲುಶಿಕ್ಷೆಗೆ ಗುರಿಯಾಗಿದ್ದ ಸಾಧ್ವಿ ಪ್ರಗ್ಯಾ ಸಿಂಗ್ ಎಂಬ ಬಿಜೆಪಿ ಲೋಕಸಭಾ ಅಭ್ಯರ್ಥಿ ಇದೀಗ “ಗೋಡ್ಸೆ ಒಬ್ಬ ದೇಶಭಕ್ತನಾಗಿದ್ದ, ಮುಂದೆಯೂ ದೇಶಭಕ್ತನಾಗೇ ಇರುತ್ತಾನೆ” ಎಂಬ ಹೇಳಿಕೆ ನೀಡುವ ಮೂಲಕ ಬಿಜೆಪಿ ಮತ್ತು ಸಂಘಪರಿವಾರದ ‘ದೇಶಭಕ್ತಿ’ಯ ಮಾನದಂಡವೇನು ಎಂಬುದನ್ನು ಬಹಿರಂಗವಾಗಿ ಸಮರ್ಥಿಸಿಕೊಂಡಿದ್ದಾರೆ.

ಆ ಹಿನ್ನೆಲೆಯಲ್ಲಿ ನಾಥೂರಾಂ ಗೋಡ್ಸೆ ಎಂಬ ಮತಾಂಧ ಉಗ್ರನ ಕುರಿತ ಚರ್ಚೆಗಳು ಮತ್ತೊಮ್ಮೆ ಮುಂಚೂಣಿಗೆ ಬಂದಿವೆ. ಹಾಗಾದರೆ, ಗೋಡ್ಸೆ ಮತ್ತು ಬಿಜೆಪಿಯ ‘ಸೈದ್ಧಾಂತಿಕ ಅಡಿಪಾಯ’ದ ಹಿಂದುತ್ವವಾದಿ ಸಂಘಟನೆಗಳಿಗೂ ಇರುವ ಸಂಬಂಧವೇನು? ಗೋಡ್ಸೆ ಹಾಗೂ ಬಿಜೆಪಿಯ ಆದರ್ಶ ನಾಯಕ ವಿನಾಯಕ ಧಾಮೋದರ ಸಾವರ್ಕರ್ ನಡುವಿನ ಸಂಬಂಧವೇನು? ಗೋಡ್ಸೆಯ ಹೀನಾಯ ಅಪರಾಧ, ಭಯೋತ್ಪಾದನಾ ಕೃತ್ಯದ ಹಿಂದೆ ಯಾರ ಕುಮ್ಮಕ್ಕು ಇತ್ತು? ಮಹಾತ್ಮಾ ಗಾಂಧಿ ಹತ್ಯೆಯ ಸಂಚಿನ ಹಿಂದೆ ಯಾವೆಲ್ಲಾ ಸಂಘಟನೆಗಳು, ಯಾವೆಲ್ಲಾ ವ್ಯಕ್ತಿಗಳ ಪಾತ್ರವಿತ್ತು? ನಿಜಕ್ಕೂ ಗೋಡ್ಸೆ ಮತ್ತು ಆತನ ಸಹಚರರು ಹತ್ಯೆಗೆ ಕೆಲವೆ ಗಂಟೆಗಳ ಮುನ್ನ ಯಾರನ್ನಾದರೂ ಭೇಟಿಯಾಗಿ ಅವರಿಂದ ನಿರ್ದೇಶನ ಪಡೆದಿದ್ದರೆ? ಹಾಗೆ ಸೂಚನೆ ಪಡೆದಿದ್ದಲ್ಲಿ, ಸೂಚನೆ ಕೊಟ್ಟ ವ್ಯಕ್ತಿ ಯಾರು?

ಹೀಗೆ ಸಾಲು ಸಾಲು ಪ್ರಶ್ನೆಗಳು ಈಗ ಮತ್ತೆ ದೇಶಾದ್ಯಂತ ಚರ್ಚೆಯಾಗತೊಡಗಿವೆ. ಆ ಹಿನ್ನೆಲೆಯಲ್ಲಿ, ಗಾಂಧಿ ಹತ್ಯೆಯ ಸಂಚಿನ ಕುರಿತು ನ್ಯಾಯಾಂಗ ತನಿಖೆ ನಡೆಸಿದ ಸುಪ್ರೀಂಕೋರ್ಟಿನ ನಿವೃತ್ತ ನ್ಯಾಯಮೂರ್ತಿ ಜೆ ಎಲ್ ಕಪೂರ್ ತನಿಖಾ ಆಯೋಗದ ವರದಿ(1969ರಲ್ಲಿ ಮಂಡನೆಯಾದ ವರದಿ) ಏನು ಹೇಳುತ್ತದೆ ಎಂಬ ಕುತೂಹಲದಿಂದ ವರದಿಯ ಮೇಲೆ ಕಣ್ಣಾಡಿಸಿದಾಗ ಸಿಕ್ಕ ವಿವರಗಳು ದಂಗುಬಡಿಸುವಂತಿವೆ. ಅದರಲ್ಲೂ ಗೋಡ್ಸೆ ಮತ್ತು ಸಾವರ್ಕರ್ ನಡುವಿನ ನಂಟಿನ ಕುರಿತ ಆಯೋಗದ ಅಭಿಪ್ರಾಯ ಮತ್ತು ವಿವರಗಳು ಕುತೂಹಲಕಾರಿ. ಆ ಹಿನ್ನೆಲೆಯಲ್ಲಿ, ಗಾಂಧಿ ಹತ್ಯೆಗೆ ಕೆಲವೇ ಗಂಟೆಗಳ ಮುನ್ನ ಗೋಡ್ಸೆ ಸೇರಿದಂತೆ ಆತನ ಸಹಚರರ ಚಲನವಲನದ ಕುರಿತು ನ್ಯಾ. ಕಪೂರ್ ಆಯೋಗ ತನ್ನ ವರದಿಯಲ್ಲಿ ನೀಡಿರುವ ವಿವರಗಳು ಇಲ್ಲಿವೆ;

ಗಾಂಧಿ ಹತ್ಯೆಯ ಹಿಂದಿನ ಸಂಚಿನ ಕುರಿತು ತನಿಖೆ ನಡೆಸಲು 1966ರಲ್ಲಿ ನ್ಯಾ. ಕಪೂರ್ ನೇತೃತ್ವದ ಆಯೋಗ ರಚನೆಯಾದ ಬಳಿಕ, ತನಿಖೆಯ ವ್ಯಾಪ್ತಿಯನ್ನು ಪುನರ್ ವ್ಯಾಖ್ಯಾನಿಸಲಾಯಿತು ಮತ್ತು ಆ ಮೂಲಕ ಗಾಂಧಿ ಹತ್ಯೆಯ ಸಂಚು ಮಾತ್ರವಲ್ಲ, ಯಾವುದೇ ಒಬ್ಬ ವ್ಯಕ್ತಿ ಅಥವಾ ಹಲವರಿಂದ ಗಾಂಧಿಯ ಹತ್ಯೆ ನಡೆಸುವ ಅಥವಾ ಅವರ ಜೀವಕ್ಕೆ ಅಪಾಯ ತರುವ ಯಾವುದೇ ಬಗೆಯ ಉದ್ದೇಶ, ಯೋಜನೆ ಸೇರಿದಂತೆ ಎಲ್ಲಾ ಬಗೆಯ ಮಾಹಿತಿಯನ್ನು ಕೂಡ ವಿಚಾರಣಾ ವ್ಯಾಪ್ತಿಗೆ ಸೇರಿಸಲಾಯಿತು. ಹಾಗಾಗಿ, ಗಾಂಧಿ ಜೀವಕ್ಕೆ ಅಪಾಯವಿರುವ ಬಗ್ಗೆ ಮಹಾತ್ಮನ ಹತ್ಯೆಗೆ ಮುನ್ನ ಹಿಂದೂ ಮಹಾಸಭಾ ನಾಯಕರಾದ ಜಿ ವಿ ಕೇತ್ಕರ್, ಬಾಲುಕಾಕಾ ಕಾನಿಟ್ಕರ್, ಎಸ್‌ ಆರ್ ಭಾಗವತ್, ಕೇಶವರಾವ್ ಜಢೆ, ಆರ್ ಕೆ ಖಾಂಡೇಲ್ಕರ್ ಮತ್ತು ಎನ್‌ ವಿ ಗಾಡ್ಗೀಳ್ ಅವರಿಗೆ ಇದ್ದ ಮಾಹಿತಿ ಕೂಡ ಆಯೋಗದ ವ್ಯಾಪ್ತಿಗೆ ಸೇರಿತು. ಆ ಹಿನ್ನೆಲೆಯಲ್ಲಿಯೇ ಕೇತ್ಕರ್ ಅವರನ್ನು ಒಂದನೇ ಸಾಕ್ಷಿಯಾಗಿ ಹೆಸರಿಸಲಾಯಿತು ಮತ್ತು ಆ ಒಂದನೇ ಸಾಕ್ಷಿ ನೀಡಿದ ದಾಖಲೆ, ಹೇಳಿಕೆ ಮತ್ತು ಸಾಂದರ್ಭಿಕ ಸಾಕ್ಷ್ಯಗಳ ಹಿನ್ನೆಲೆಯಲ್ಲಿ ಆಯೋಗದ ಮುಂದಿನ ಅವರ ಹೇಳಿಕೆಯನ್ನು ವಿಶ್ಲೇಷಿಸಲಾಯಿತು.

ಹೀಗೆ ತನ್ನ ವಿಚಾರಣೆಯ ವಿಷಯ, ವ್ಯಾಪ್ತಿ ಮತ್ತು ಮಿತಿಗಳನ್ನು ವ್ಯಾಖ್ಯಾನಿಸಿಕೊಂಡು ನ್ಯಾ. ಕಪೂರ್ ಆಯೋಗ, ತನ್ನ ವರದಿಯಲ್ಲಿ, ಬಳಿಕ ಗಾಂಧಿ ಹತ್ಯೆ ಮತ್ತು ಸಂಚಿನ ರೂವಾರಿಗಳ ಹಿನ್ನೆಲೆಯನ್ನು ವಿವರಿಸಿದೆ.

ಗೋಡ್ಸೆ; ಹಿಂದೂ ರಾಷ್ಟ್ರ ದಳದ ಮೂಲ ಸಂಸ್ಥಾಪಕರಲ್ಲಿ ಒಬ್ಬ. ರಾಷ್ಟ್ರದಳ 1942ರ ಮೇನಲ್ಲಿ ಪೂನಾದಲ್ಲಿ ತನ್ನ ಮೊದಲ ಶಿಬಿರ ನಡೆಸಿತ್ತು. 1944ರ ಜನವರಿ 16ರಂದು ಆತ ಆಪ್ಟೆಯೊಂದಿಗೆ ಸೇರಿ ಒಂದು ವೃತ್ತಪತ್ರಿಕೆಯನ್ನು ಆರಂಭಿಸಲು ನಿರ್ಧರಿಸಿದ ಮತ್ತು ಅದೇ ವರ್ಷದ ಮಾರ್ಚ್ 1ರಂದು ‘ದ ಅಗ್ರಣಿ’ ಪತ್ರಿಕೆಯನ್ನು ಆರಂಭಿಸಿದ.

1948ರ ಜನವರಿ 2 ಅಥವಾ 3ರಂದು ಗೋಡ್ಸೆ ಮತ್ತು ಆಪ್ಟೆ ಅಹಮದ್‌ನಗರಕ್ಕೆ ಹೋಗಿ ಅಲ್ಲಿ ಕರ್ಕರೆಯನ್ನು ಭೇಟಿ ಮಾಡಿದರು. ಜನವರಿ 10ರಂದು, ಬಾಂಬೆಯ ಹಿಂದೂ ಮಹಾಸಭಾ ಕಚೇರಿಯಲ್ಲಿ ಬಾಡ್ಗೆ, ಅಸ್ತ್ರ(ಸರಕು ಎಂಬ ಪದ ಬಳಕೆಯಾಗಿತ್ತು!) ಒದಗಿಸುವುದಾಗಿ ಗೋಡ್ಸೆ ಮತ್ತು ಅಪ್ಟೆಗೆ ಭರವಸೆ ನೀಡಿದ್ದ. ಬಳಿಕ 1948ರ ಜನವರಿ 14ರಂದು ಗೋಡ್ಸೆ ಮತ್ತು ಆಪ್ಟೆ ಜೊತೆಯಾಗಿ ಸಾವರ್ಕರ್ ಭೇಟಿ ಮಾಡುತ್ತಾರೆ. ಭಾಡ್ಗೆ ತಾನು ಹೇಳಿದಂತೆ ‘ಅಸ್ತ್ರ’ ತರುತ್ತಾನೆ. ನಂತರ ಗೋಡ್ಸೆ, ಆಪ್ಟೆ, ಭಾಡ್ಗೆ ಮತ್ತು ಶಂಕರ್ ಸೇರಿ ದೀಕ್ಷಿತ್ ಮಹರಾಜ್ ಅವರ ನಿವಾಸಕ್ಕೆ ಹೋಗಿ, ‘ಅಸ್ತ್ರ’ಗಳನ್ನು ಅವರ ಮನೆಯಲ್ಲಿಯೇ ಇಡುತ್ತಾರೆ. ‘ಅಸ್ತ್ರ’ವನ್ನು ಸ್ವತಃ ದೀಕ್ಷಿತ್ ಮಹರಾಜ್‌ ಅವರಿಗೇ ಖುದ್ದಾಗಿ ಕೊಡುತ್ತಾರೆಯೇ ಅಥವಾ ಅವರ ಸೇವಕರಿಗೆ ಕೊಡುತ್ತಾರೆಯೇ ಎಂಬುದು ಸ್ಟಷ್ಟವಾಗಿಲ್ಲ.

ಬಳಿಕ 1948ರ ಜನವರಿ 15ರಂದು ಗೋಡ್ಸೆ, ಆಪ್ಟೆ, ಭಾಡ್ಗೆ, ಕರ್ಕರೆ ಮತ್ತು ಮದನ್‌ಲಾಲ್ ಅವರುಗಳು ಹಿಂದೂ ಮಹಾಸಭಾ ಕಚೇರಿಯಲ್ಲಿ ಸಭೆ ನಡೆಸುತ್ತಾರೆ. ಆ ಬಳಿಕ ಅವರೆಲ್ಲಾ ದೀಕ್ಷಿತ್ ಮಹರಾಜ್ ಅವರ ಮನೆಗೆ ಹೋಗಿ, ಅಲ್ಲಿಂದ ‘ಅಸ್ತ್ರ’ಗಳನ್ನು ವಾಪಸು ಪಡೆಯುತ್ತಾರೆ. ಕರ್ಕರೆ ಮತ್ತು ಮದನ್‌ಲಾಲ್‌ಗೆ ಕೂಡಲೇ ದೆಹಲಿಗೆ ಹೊರಡಲು ಹೇಳಲಾಗುತ್ತದೆ. ಬಳಿಕ ಗೋಡ್ಸೆ ಪೂನಾಕ್ಕೆ ಮರಳುತ್ತಾನೆ. ಭಾಡ್ಗೆ, ತಾನೂ ದೆಹಲಿಗೆ ಹೋಗುವುದಾಗಿ ಭರವಸೆ ನೀಡುತ್ತಾನೆ.

ನಂತರ 1948ರ ಜನವರಿ 17ರಂದು ಗೋಡ್ಸೆ, ಆಪ್ಟೆ, ಭಾಡ್ಗೆ ಮತ್ತು ಶಂಕರ್ ಸೇರಿ ಮತ್ತೊಮ್ಮೆ ಸಾವರ್ಕರ್ ಮನೆಗೆ ಹೋಗಿ, ಅವರನ್ನು ಖುದ್ದು ಭೇಟಿ ಮಾಡುತ್ತಾರೆ. ಆ ಮಾತುಕತೆಯ ಬಳಿಕ ಕೂಡಲೇ ಗೋಡ್ಸೆ ಮತ್ತು ಆಪ್ಟೆ ದೆಹಲಿಗೆ ಹೊರಡುತ್ತಾರೆ. ಬಾಂಬೆಯಲ್ಲಿ ಮಧ್ಯಾಹ್ನದ 2 ಗಂಟೆಯ ವಿಮಾನವೇರಿ ಸಂಜೆ 7.30ಕ್ಕೆ ದೆಹಲಿಗೆ ತಲುಪುತ್ತಾರೆ. ದೆಹಲಿಯ ಮರೀನಾ ಹೋಟೆಲಿನಲ್ಲಿ ಜನವರಿ 17ರಿಂದ 20ರವರೆಗೆ ತಂಗುತ್ತಾರೆ. ಆ ನಡುವೆ, ಜನವರಿ 19ರಂದು ಅವರಿಬ್ಬರು ಹಿಂದೂ ಮಹಾಸಭಾ ದೆಹಲಿ ಕಚೇರಿಯಲ್ಲಿ ಭಾಡ್ಗೆಯನ್ನು ಭೇಟಿ ಮಾಡುತ್ತಾರೆ. ಅಲ್ಲದೆ, ಅಶುತೋಷ್‌ ಲಹಿರಿ ಮತ್ತು ಡಾ ಸತ್ಯಪ್ರಕಾಶ್ ಅವರನ್ನೂ ಹಿಂದೂ ಮಹಾಸಭಾ ಭವನದಲ್ಲಿ ಅವರು ಭೇಟಿ ಮಾಡುತ್ತಾರೆ. ಜನವರಿ 20ರಂದು ಮರೀನಾ ಹೋಟೆಲಿನಲ್ಲಿ ನಾಥೂರಾಂ ಗೋಡ್ಸೆ, ಆಪ್ಟೆ, ಕರ್ಕರೆ, ಮದನ್‌ಲಾಲ್‌, ಶಂಕರ್, ಗೋಪಾಲ ಗೋಡ್ಸೆ ಮತ್ತು ಭಾಡ್ಗೆ ಸಭೆ ಸೇರುತ್ತಾರೆ. ಅಂದೇ ಸಂಜೆ, ಮಹಾತ್ಮರ ಪ್ರಾರ್ಥನಾ ಸಭೆಯ ಹೊತ್ತಿಗೆ, ನಾಥೂರಾಂ ಗೋಡ್ಸೆಯ ಉಸ್ತುವಾರಿಯಲ್ಲಿ ಮದನ್‌ ಲಾಲ್ ಕೈಬಾಂಬ್ ಸ್ಫೋಟಿಸುತ್ತಾನೆ. ಸ್ಫೋಟ ಸಂಭವಿಸುತ್ತಲೇ ಗೋಡ್ಸೆ ಮತ್ತು ಆಪ್ಟೆ ಅಲ್ಲಿಂದ ಕಾಲುಕೀಳುತ್ತಾರೆ. ಕೂಡಲೇ ಹೋಟೆಲ್ ಕೊಠಡಿ ಖಾಲಿ ಮಾಡಿಕೊಂಡು ಕಾನ್ಪುರಕ್ಕೆ ರಾತ್ರಿ ರೈಲಿನಲ್ಲಿ ಪರಾರಿಯಾಗುತ್ತಾರೆ.

ಬೆಳಗಿನ ಜಾವ ಕಾನ್ಪುರಕ್ಕೆ ತಲುಪುವ ಅವರು, ಅಂದು ಇಡೀ ದಿನ ರೈಲು ನಿಲ್ದಾಣದ ವಿಶ್ರಾಂತಿ ಕೊಠಡಿಯಲ್ಲೇ ಕಾಲಕಳೆಯುತ್ತಾರೆ. ಮಾರನೇ ದಿನ; ಅಂದರೆ ಜನವರಿ 22ರಂದು ಕಾನ್ಪುರದಿಂದ ಬಾಂಬೆಗೆ ಪಂಜಾಬ್ ಮೇಲ್ ರೈಲಿನಲ್ಲಿ ಪ್ರಯಾಣಿಸುತ್ತಾರೆ. ಜನವರಿ 23ರಂದು ಬಾಂಬೆ ತಲುಪುತ್ತಾರೆ. ಬಾಂಬೆಯ ಆರ್ಯ ಪಥಿಕ್ ಆಶ್ರಮದಲ್ಲಿ ಒಂದು ದಿನ ಮತ್ತು ಒಂದು ರಾತ್ರಿ ಕಳೆಯುವ ಅವರು, ಜನವರಿ 24ರಂದು ಎಲ್ಫಿನ್‌ಸ್ಟೋನ್ ಹೋಟೆಲ್ ಅನೆಕ್ಸ್‌ಗೆ ಸ್ಥಳಾಂತರಗೊಳ್ಳುತ್ತಾರೆ. ಜನವರಿ 25ರಂದು ವಿಲ್ಲಾ ಪಾರ್ಲೆಯಲ್ಲಿ ಗೋಡ್ಸೆ, ಆಪ್ಟೆ ಇಬ್ಬರೂ, ಕರ್ಕರೆ ಮತ್ತು ಗೋಪಾಲ್ ಗೋಡ್ಸೆಯನ್ನು ಭೇಟಿ ಮಾಡುತ್ತಾರೆ. ಅದೇ ದಿನ ಸುಳ್ಳು ಹೆಸರುಗಳನ್ನು ನೀಡಿ, ಜನವರಿ 27ರ ದಿನಾಂಕಕ್ಕೆ ದೆಹಲಿಗೆ ಏರ್ ಇಂಡಿಯಾ ವಿಮಾನದಲ್ಲಿ ಸೀಟು ಕಾಯ್ದಿರಿಸಿದರು.

ಅಲ್ಲದೆ, ಅದೇ ದಿನ; ಜನವರಿ 25ರಂದೇ, ಗೋಡ್ಸೆ ಮತ್ತು ಆಪ್ಟೆ ಬಾಂಬೆಯ ಬ್ಯಾಂಕ್ ಸಿಲ್ವರ್ ಕಂಪನಿಯ ಪರಾಂಜಪೆ ಎಂಬುವರಿಂದ ಹತ್ತು ಸಾವಿರ ರೂ. ಸಾಲ ಪಡೆದರು. ಮಾರನೇ ದಿನ ಸಾಲದ ಹಣದಲ್ಲಿ ಎಂಟು ಸಾವಿರವನ್ನು ಚೆಕ್‌ ಮೂಲಕವೂ, ಉಳಿದ ಎರಡು ಸಾವಿರ ರೂ.ಗಳನ್ನು ನಗದಾಗಿಯೂ ಪರಾಂಜಪೆ ಗೋಡ್ಸೆಗೆ ನೀಡಿದ್ದ. ಆ ಹಣ ‘ಹಿಂದೂ ರಾಷ್ಟ್ರ’ಕ್ಕಾಗಿ ಎಂದು ಪಡೆಯಲಾಗಿತ್ತು. ಜನವರಿ 27ರಂದು ಗೋಡ್ಸೆ ಮತ್ತು ಆಪ್ಟೆ ವಿಮಾನದ ಮೂಲಕ ದೆಹಲಿಗೆ ತಲುಪುತ್ತಾರೆ ಮತ್ತು ಅದೇ ದಿನ ಮಧ್ಯಾಹ್ನ ಗ್ರಾಂಡ್ ಟ್ರಂಕ್ ಎಕ್ಸ್ ಪ್ರೆಸ್ ರೈಲಿನಲ್ಲಿ ಗ್ವಾಲಿಯರಿಗೆ ಹೋಗಿ, ಅಲ್ಲಿ ಡಾ ಪಾರ್ಚುರೆ ನಿವಾಸದಲ್ಲಿ ತಂಗುತ್ತಾರೆ. ಅವರಿಗಾಗಿ ಮಾರನೇ ದಿನ ಗೋಯಲ್ ಒಂದು ರಿವಾಲ್ವರ್ ತರುತ್ತಾನೆ. ಆದರೆ, ಅದು ಸರಿಯಾಗಿ ಕೆಲಸ ಮಾಡುತ್ತಿರುವುದಿಲ್ಲ. ದಂಢವತೆ ಮತ್ತೊಂದು ರಿವಾಲ್ವರ್ ತರುತ್ತಾನೆ. ಆ ರಿವಾಲ್ವರನ್ನು ಗೋಡ್ಸೆ 300ರೂಪಾಯಿ ನೀಡಿ ಖರೀದಿಸುತ್ತಾನೆ. ಅಂದೇ ಗ್ವಾಲಿಯರ್ ತೊರೆಯುವ ಅವರು, ಮಾರನೇ ದಿನ; ಅಂದರೆ ಜನವರಿ 29ರಂದು ದೆಹಲಿಗೆ ತಲುಪುತ್ತಾರೆ. ಅಂದು ಅವರು ದೆಹಲಿ ಮುಖ್ಯ ರೈಲು ನಿಲ್ದಾಣದ ವಿಶ್ರಾಂತಿ ಕೊಠಡಿಯೊಂದರಲ್ಲಿ(ಕೊಠಡಿ ಸಂಖ್ಯೆ 6) ತಂಗುತ್ತಾರೆ. ಅಂದು ಅವರೊಂದಿಗೆ ಕರ್ಕರೆ ಕೂಡ ತಂಗುತ್ತಾನೆ.

ಈ ನಡುವೆ, ಹಣಕಾಸಿನ ವಿಷಯದಲ್ಲಿ ಸಾಕಷ್ಟು ತಯಾರಿಮಾಡಿಕೊಂಡಿದ್ದ ಗೋಡ್ಸೆ, 1948ರ ಜನವರಿ 17ರಂದು ಕಾಳೆ ಎಂಬವನಿಂದ ಒಂದು ಸಾವಿರ ರೂ. ಹಾಗೂ ಲಾಲ್‌ ಬಾಗ್‌ನಲ್ಲಿ ಚಂದ್ರದಾಸ್ ಎಂಬುವರನ್ನು ಭೇಟಿ ಮಾಡಿ ಅವರಿಂದ ಐದು ಸಾವಿರ ರೂ. ವಂತಿಗೆ ಪಡೆದುಕೊಂಡಿದ್ದ.

ಈ ಎಲ್ಲಾ ಚಟುವಟಿಕೆ, ಪೂರ್ವತಯಾರಿಗಳ ಪೈಕಿ ಮುಖ್ಯವಾಗಿ ಜನವರಿ 29 ಮತ್ತು 30ರ ಅವರ ಚಲನವಲನಗಳು ಮಹತ್ವದ್ದು. ಹಾಗಾಗಿ ಆ ವಿವರಗಳು ಇಂತಿವೆ;

ಜನವರಿ 29ರಂದು ಬೆಳಗ್ಗೆ ಕರ್ಕರೆ ಬಿರ್ಲಾ ಧರ್ಮಶಾಲೆಗೆ ಭೇಟಿ ನೀಡುತ್ತಾನೆ. ಅಲ್ಲಿಯೇ ಗೋಡ್ಸೆ ಮತ್ತು ಆಪ್ಟೆ ಆತನನ್ನು ಭೇಟಿಯಾಗುತ್ತಾರೆ. ಮಧ್ಯಾಹ್ನ ಸುಮಾರು ಒಂದು ಗಂಟೆಯ ಹೊತ್ತಿಗೆ, ಆಪ್ಟೆ, ಗೋಡ್ಸೆ ಮತ್ತು ಕರ್ಕರೆ ದೆಹಲಿ ಹಳೆಯ ರೈಲು ನಿಲ್ದಾಣಕ್ಕೆ ಹೋಗಿ ವಿಶ್ರಾಂತಿ ಕೊಠಡಿ 6ರಲ್ಲಿ ಜಾಗ ಕಾಯ್ದಿರಿಸುತ್ತಾರೆ. ಆ ವೇಳೆ, ಗೋಡ್ಸೆ ತನ್ನ ಹೆಸರನ್ನು ವಿನಾಯಕ ರಾವ್ ಎಂದು ಬರೆಸುತ್ತಾನೆ. ನಂತರ ಮೂವರೂ ‘ಮೈದಾನ’ಕ್ಕೆ ತೆರಳಿ, ಅಲ್ಲಿ ಕೂತು ಕೆಲವು ಪ್ರಮುಖ ತೀರ್ಮಾನಗಳನ್ನು ಕೈಗೊಳ್ಳುತ್ತಾರೆ. ಬಳಿಕ ಸಂಜೆ 4ಕ್ಕೆ ಮೂವರೂ(ಗೋಡ್ಸೆ, ಆಪ್ಟೆ ಮತ್ತು ಕರ್ಕರೆ) ಬಿರ್ಲಾ ಹೌಸ್‌ಗೆ ಹೋಗುತ್ತಾರೆ. ಅಲ್ಲಿನ ಪ್ರಾರ್ಥನಾ ಸಭೆಯಲ್ಲಿ ಸುಮಾರು 400ಕ್ಕೂ ಹೆಚ್ಚು ಮಂದಿ ಭಾಗಿಯಾಗಿರುವುದನ್ನು ಗಮನಿಸುತ್ತಾರೆ. ಬಳಿಕ ಹಳೆಯ ರೈಲು ನಿಲ್ದಾಣಕ್ಕೆ ವಾಪಸ್ಸಾಗುತ್ತಾರೆ. ನಂತರ ಆಪ್ಟೆ ಮತ್ತು ಕರ್ಕರೆ ದೆಹಲಿಯ ಸಿನಿಮಾ ಮಂದಿರವೊಂದಕ್ಕೆ ಸಿನಿಮಾ ವೀಕ್ಷಣೆಗೆ ಹೋಗುತ್ತಾರೆ. ಸುಮಾರು ಮಧ್ಯರಾತ್ರಿಯ ಹೊತ್ತಿಗೆ ಆ ಇಬ್ಬರು ಸಿನಿಮಾದಿಂದ ವಾಪಸ್ಸಾಗುತ್ತಾರೆ. ಈ ನಡುವೆ ಆ ದಿನ ಮಧ್ಯಾಹ್ನದ ಹೊತ್ತಿಗೆ ಆಪ್ಟೆ, ಗೋಡ್ಸೆ ಮತ್ತು ಕರ್ಕರೆ ಮೂವರೂ ಬಿರ್ಲಾ ಮಂದಿರದ ಹಿಂದಿನ ಕಾಡಿಗೆ ತೆರಳಿದ್ದರು ಮತ್ತು ಅಲ್ಲಿ ಗೋಡ್ಸೆ ಮೂರು ಅಥವಾ ನಾಲ್ಕು ಬಾರಿ ಗುಂಡು ಹಾರಿಸಿ ತನ್ನ ಪಿಸ್ತೂಲಿನ ಪರೀಕ್ಷೆ ನಡೆಸುತ್ತಾನೆ. ಬಳಿಕ ಕೈಬಾಂಬುಗಳನ್ನು ಅಲ್ಲಿ ಹೂತು ವಾಪಸ್ಸಾಗುತ್ತಾರೆ.

ಮಾರನೇ ದಿನ; ಜನವರಿ 30ರ ದುರ್ದಿನ, ಗೋಡ್ಸೆ, ಅಪ್ಟೆ ಮತ್ತು ಕರ್ಕರೆ ರೈಲು ನಿಲ್ದಾಣದ ಹೋಟೆಲಿನಲ್ಲಿ ತಿಂಡಿ ತಿಂದು ಬಿರ್ಲಾ ಮಂದಿರದತ್ತ ಹೊರಡುತ್ತಾರೆ. ಬಿರ್ಲಾ ಮಂದಿರದ ಹಿಂದಿನ ಕಾಡಿನಲ್ಲಿ ಗೋಡ್ಸೆ ಮತ್ತೆ ಮೂರ್ನಾಲ್ಕು ಬಾರಿ ಗುಂಡು ಹಾರಿಸಿ ಪಿಸ್ತೂಲಿನಲ್ಲಿ ಅಭ್ಯಾಸ ನಡೆಸುತ್ತಾನೆ. ಬೆಳಗ್ಗೆ 10.30ರ ಹೊತ್ತಿಗೆ ಗೋಡ್ಸೆ ಹಳೆಯ ರೈಲು ನಿಲ್ದಾಣಕ್ಕೆ ವಾಪಸ್ಸಾದರೆ, ಕರ್ಕರೆ ಮದ್ರಾಸ್‌ ಹೋಟೆಲ್‌ಗೆ ಹೋಗುತ್ತಾನೆ. ಅಲ್ಲಿಂದ ಕರ್ಕರೆ ಮಧ್ಯಾಹ್ನ 2ರ ಹೊತ್ತಿಗೆ ಹಳೆಯ ರೈಲು ನಿಲ್ದಾಣಕ್ಕೆ ವಾಪಸ್ಸಾಗಿ ಗೋಡ್ಸೆ ಮತ್ತು ಆಪ್ಟೆಯನ್ನು ಸೇರಿಕೊಳ್ಳುತ್ತಾನೆ. ನಂತರ ಸಂಜೆ 4.30ಕ್ಕೆ ರೈಲು ನಿಲ್ದಾಣದಿಂದ ಹೊರಟ ಮೂವರೂ, ಟಾಂಗಾ ಗಾಡಿಯಲ್ಲಿ ಬಿರ್ಲಾ ಮಂದಿರ ತಲುಪುತ್ತಾರೆ. ಗೋಡ್ಸೆ ಬಿರ್ಲಾ ಮಂದಿರದ ದೇವರ ದರ್ಶನ ಪಡೆಯುತ್ತಾನೆ. ಆಪ್ಟೆ ಮತ್ತು ಕರ್ಕರೆ ಬಿರ್ಲಾ ಹೌಸಿನ ಕಡೆ ಪ್ರಯಾಣಿಸುತ್ತಾರೆ. ಬಳಿಕ ಸಂಜೆ 5ರ ಹೊತ್ತಿಗೆ ನಾಥೂರಾಂ ಗೋಡ್ಸೆ ಮಹಾತ್ಮ ಗಾಂಧಿಗೆ ಗುಂಡಿಕ್ಕುತ್ತಾನೆ!.

LEAVE A REPLY

Please enter your comment!
Please enter your name here